過期食物
仲食得或者啱啱過期嘅食物。最好嘅出路係轉贈俾人食。
Food waste 101
廚餘
小知識
廚餘係咩？「廚房的餘物」。佢唔係要怕嘅嘢，係未搵到出路嘅食物。呢度係我哋喺工作坊入面最常講嘅嘢。
01
三種廚餘
餐前廚餘
煮之前已經有嘅：果皮、菜頭菜尾、蛋殼、咖啡渣。一定會有、最易再用 —— 我哋主力處理呢類。
餐後廚餘
食剩嘅飯餸。最好嘅方法係煮啱份量、食晒佢，減少先過回收。
02
香港廚餘數字
3,001公噸：香港每日棄置嘅廚餘（2024）
8.7%廚餘回收率 —— 每 10 份，得唔夠 1 份有出路
0.4kg每人每日，大約一個飯盒
60×家居廚餘回收量：由每日 2 公噸升到超過 120 公噸
資料來源：環保署《香港固體廢物監察報告 — 2024 年廢物統計數字》（2025 年 12 月公布）。每日棄置量約等於 250 架雙層巴士（以每架約 12 公噸計）。
03
屋企嘅廚餘去咗邊？
大部分：堆填區
由屋企垃圾桶，到大廈垃圾站，再去堆填區。而家家居垃圾主要去屯門同打鼓嶺；將軍澳堆填區 2016 年起只收建築廢物。
O·PARK 有機資源回收中心
O·PARK1 喺大嶼山小蠔灣，O·PARK2 喺北區沙嶺（2024 年啟用），用厭氧消化將廚餘變成生物氣發電，同時產出堆肥。
智能廚餘回收桶
公共屋邨同唔少私人屋苑都有，會統計回收量。
冇垃圾徵費，更靠自己
垃圾徵費 2025 年擱置。冇人罰錢，就更加要有意識咁分類同回收。
04
廚餘排名
1
第一名：餐前廚餘
果皮、蛋殼、咖啡渣、菜頭菜尾。營養豐富，最啱做堆肥 —— 亦係最避免唔到嘅一類。
2
第二名：少油少鹽嘅餐後廚餘
湯渣、涼茶渣。可以盡量食，或者留嚟做下一餐嘅材料。
3
第三名：多油多鹽嘅餐後廚餘
薯條、意粉呢類唔啱堆肥，但最可以避免：食晒佢、買少啲、嗌少飯。
05
咩可以回收？
✅ 收
- 果皮
- 菜頭菜尾
- 蛋殼（生蛋殼洗走蛋白）
- 咖啡渣*
- 涼茶渣*
- 湯渣
- 不含添加劑嘅過期食品
❌ 唔收
- 肉類（生／熟）
- 有油、有鹽嘅食物
*風乾咗更好，例如曬太陽或者焗爐烘乾。
06
屋企用 Bokashi 桶
- 01倒入廚餘菜、蛋殼、果皮、咖啡渣、茶渣。
- 02灑發酵粉、蓋實每次一薄層，過程唔會有異味。
- 03密封三星期變成半熟堆肥。
- 04撈泥再等一星期加等量泥土，就變熟成堆肥，可以用嚟種嘢。
唔好放：肉類骨頭、海鮮貝殼、硬果皮同大粒果核（例如榴槤殼、牛油果核）。
07
環保酵素配方
1 糖 ：3 果皮 ：10 水。樽要留 30% 空間，發酵 3 個月，就可以用嚟洗碗、拖地、洗菜。
| 樽 | 糖 | 果皮 | 水 |
|---|---|---|---|
| 500 ml | 25 g | 75 g | 250 ml |
| 700 ml | 40 g | 120 g | 400 ml |
| 1000 ml | 50 g | 150 g | 500 ml |
08
講多啲
食物系統每一段都有廚餘
由生產、加工包裝、零售到消費者，中間靠運輸 —— 蟲蛀、撞爛、唔合規格、樣衰上唔到架，都會變廚餘。全球最大量喺前段；香港最大問題喺消費者，尤其餐後。
點解我哋專注餐前廚餘
餐後廚餘可以變零 —— 食晒佢就得；但餐前廚餘避免唔到，冇人會食蛋殼。剩食轉贈已經有 Green Price、食德好、惜食堂做緊，所以我哋揀餐前。
點解油同鹽唔啱堆肥
油水唔溝，會令泥土同水隔絕；鹽會令泥土鹽化，愈嚟愈乾。湯渣都有少少油鹽，但少好多。
堆肥點運作
益菌同蟲蟲係食物鏈底層嘅「降解者」，將腐枯嘅嘢分解成養份，返落泥土，再養返農作物。
黑水虻唔係烏蠅
黑水虻成蟲只繁殖同飲水、唔進食，所以唔會傳播病菌。1 克蟲卵可以變成超過 1 公斤蟲，食廚餘之餘仲可以做飼料。
香港掉垃圾太方便
方便到令回收變得相對唔方便。加上「有剩有福氣」嘅文化，叫多過需要變咗正常。
09
常見誤解
「廚餘即係垃圾」
佢係廚房嘅餘物，只係未搵到出路。
「掉落大廈垃圾站就會回收」
大部分都冇回收到，直接去咗堆填區。
「廚餘一定有陣味」
氣味係處理方法嘅問題：水份太多、浸住，就會厭氧發酵出味。乾濕分開、雪住，或者用 Bokashi 密封，就唔會有味。
「回收咗就唔使減量」
餐後廚餘最好嘅方法係減少，回收係下策。
10
今晚就做得到
1
煮啱份量
叫飯時講聲「少飯」都算。
2
蛋殼曬乾
洗淨曬乾捏碎，就係植物嘅肥料。
3
乾濕分開
果皮菜頭用個盒裝住雪起，就唔會有味。